رۆژنامەی “الشرق الأوسط” لە راپۆرتێکدا ئاشکرای کردووە کە ناکۆکییەکانی ناو چوارچێوەی هەماهەنگیی شیعە لە عێراق قووڵتر بوونەتەوە. سەرچاوە نزیکەکانی ئەو هاوپەیمانییە دەڵێن پەیوەندی لەگەڵ سەرۆک وەزیران، کۆکردنەوەی چەکی گرووپەکان و ململا‌نێی پۆستە حکومییەکان لە ناوەندی ناکۆکییەکاندان.
بەپێی راپۆرتەکە، هەندێک لایەنی چوارچێوە پشتگیری لە عەلی زەیدی دەکەن، بەڵام لایەنەکانی دیکە رەخنە لە بەڕێوەبردنی حکومەت و سەردانە دەرەکییەکانی، بە تایبەتی سەردانەکەی بۆ سووریا، دەگرن.
سەرچاوەکان دەڵێن ئەو ململا‌نێیە کاریگەری لەسەر هەوڵەکانی حکومەت بۆ بەرەنگاربوونەوەی گەندەڵی و کۆکردنەوەی چەک هەیە.
رۆژنامەکە هەروەها ئاماژە بە توندبوونەوەی ناکۆکیی نێوان لایەنگرانی نوری مالیکی و محەممەد شیاع سودانی دەکات. ئەوە لە کاتێکدایە فراکسیۆنی “ئاوەدانکردنەوە و گەشەپێدان”ی سەر بە سودانی، هەفتەی رابردوو بەشداریی لە دانیشتنەکانی پەرلەمان هەڵپەساردبوو.
ئیحسان شەمەری، سەرۆکی ناوەندی بیرکردنەوەی سیاسی، بە رۆژنامەکەی وتووە کە ململا‌نێی سەرکردایەتی و دابەشکردنی پۆستەکان یەکێتیی چوارچێوە دەخەنە ژێر فشار. بە بڕوای ئەو، ئێران هێشتا هەوڵی پاراستنی ئەو هاوپەیمانییە دەدات، بەڵام گۆڕانکارییەکی گەورەی ناوخۆیی یان ناوچەیی دەتوانێت مەترسیی لێکترازانی زیاد بکات.