دۆناڵد ترەمپ، سەرۆکی ئەمریکا، رەخنەیەکی توندی لە بڕیاری لیژنەی نۆبڵ گرت و رایگەیاند کە نەبەخشینی خەڵاتی نۆبڵی ئاشتی بە ئەو، پەڵەیەکی هەتاهەتاییە بە ناوی نەرویجەوە.
ترەمپ رۆژی هەینی، 9ی تشرینی یەکەم، لە کۆبوونەوەیەکی هەڵبژاردندا لە شاری سیراکیوزی ویلایەتی نیویۆرک، ناڕەزایی خۆی لە بەخشینی خەڵاتەکە بە ناڤی پیلای دەربڕی و وتی: خەڵاتەکەیان دا بە کەسێک کە هەرگیز ناوم نەبیستبوو، کەس نایناسێت، کەسێکی نەناسراوە.
سەرۆکی ئەمریکا بڕیارەکەی بە شەرمەزارکەر ناوبرد و وتی نەبەخشینی خەڵاتەکە بە ئەمریکا، پەڵەیەکی هەتاهەتایی لەسەر ناوی نەرویج و ئەو کەسانە جێدەهێڵێت کە بڕیارەکەیان داوە.
ترەمپ هەروەها بانگەشەی کرد کە شایستەی وەرگرتنی خەڵاتی نۆبڵی ئاشتی بووە، چونکە بە وتەی خۆی رۆڵی لە کۆتاییهێنان بە هەشت شەڕدا هەبووە. ئاماژەشی بەوە دا کە خەریکە دوو شەڕی دیکە، شەڕی ئێران و شەڕی رووسیا و ئۆکرانیا، یەکلا دەکاتەوە.
لە هەمان کاتدا، ترەمپ لە تۆڕی ترووس سۆشیاڵ رەخنەی لە ناڤی پیلای گرت و تۆمەتی ئەوەی خستە پاڵ کە دژی ئیسرائیلە.
لیژنەی نۆبڵی نەرویج رۆژی هەینی رایگەیاند کە خەڵاتی نۆبڵی ئاشتیی ساڵی 2026 بە ناڤی پیلای، دادوەری پێشووی دادگای تاوانی نێودەوڵەتی و کۆمیساری باڵای پێشووی نەتەوە یەکگرتووەکان بۆ مافی مرۆڤ، دەبەخشێت؛ ئەویش بەهۆی هەوڵەکانی بۆ پەرەپێدانی ئاشتی و یاسای نێودەوڵەتی.