
روانگەی “ئیکۆ عێراق” بۆ کاروباری ئابووری، لە راپۆرتێکیدا کە لە بارەی کارەبای عێراق لە ساڵی 2025 بڵاویکردۆتەوە، ئاماژە بەوە دەکات کە هێشتا رێژەیەکی زۆری کارەبای وڵاتەکە لە دەرەوە و لە رێگەی پرۆژە وەبەرهێنانەکانەوە دابین دەکرێت، هاوکات قەیرانی ئاویش گورزێکی گەورەی لە وێستگە ئاوییەکان وەشاندووە، بە جۆرێک کۆی گشتیی بەرهەمهێنانی کارەبا لە ساڵی رابردوودا گەیشتووەتە نزیکەی 170 ملیۆن مێگاوات/کاتژمێر.
بەپێی راپۆرتەکە، وێستگە حکومییەکان تەنیا توانیویانە 59%ی کارەبای عێراق بەرهەمبهێنن، لە بەرامبەردا 41%ـی دیکەی کارەبای وڵاتەکە لە رێگەی کڕین لە کۆمپانیا وەبەرهێنەرەکان و هاوردەکردن لە وڵاتانی دراوسێوە دابینکراوە. لە لایەکی ترەوە، بەهۆی کەمئاوی و وشکەساڵییەوە، بەرهەمهێنانی کارەبا لە وێستگە ئاوییەکان بە ڕێژەی 50.8% کەمی کردووە و لە 3.48 ملیۆن مێگاوات/کاتژمێرەوە دابەزیوە بۆ 1.71 ملیۆن مێگاوات/کاتژمێر.
جگە لەم قەیرانانە، راپۆرتەکە ئاماژەی بەوەش کردووە کە کارایی بەشێک لە وێستگەکان بۆ خوار 20% دابەزیوە، ئەوەش بەهۆی نەبوونی چاکسازیی بەردەوام و کەمیی پارچەی یەدەگ، کە وایکردووە چەندین وێستگە و هێڵی گواستنەوە بۆ ماوەیەکی درێژ لەکار بکەون.