وەزارەتی خەزانەداریی ئەمریکا لە 15ی ئۆکتۆبەری 2026 بانکی گەشەپێدانی نێودەوڵەتیی عێراقی خستە لیستی سزاکانی. ئەمریکا تۆمەتباری دەکات بەوەی یارمەتیی ئێرانی داوە بۆ دەستگەیشتن بە دۆلار و خۆدزینەوە لە سزاکانی ئەمریکا.
وەزارەتەکە هەروەها دەڵێت بانکەکە پەیوەندیی بە دامەزراوەکانی حکومەتی ئێران و گرووپە چەکدارە هاوپەیمانەکانی ئێران لە عێراقەوە هەیە.
بانکەکە تۆمەتەکان رەت دەکاتەوە و دەڵێت زانیارییەکانی ئەمریکا نادروستن. بەیاننامەکەی بانکەکە دەڵێت ئامادەیە بە رێگەی فەرمی و یاسایی لەگەڵ بانکی ناوەندیی عێراق و وەزارەتی خەزانەداریی ئەمریکا هەماهەنگی بکات. بانکەکەش رایگەیاندووە پاراستنی مافی کڕیار و بەردەوامیی خزمەتگوزارییە بانکییەکان لە پێشینەی کاریدایە.
بڕیارەکەی ئەمریکا لە چوارچێوەی یاسای سزادانی بەشی داراییی ئێران دەرچووە. بەپێی رێنمایییەکانی خەزێنەی ئەمریکا، سامان و بەرژەوەندییە داراییەکانی بانکەکە کە لە ئەمریکان یان لەژێر دەسەڵات و کۆنترۆڵی کەس و دامەزراوە ئەمریکییەکانن، بلۆک دەکرێن، مامەڵەی ئەمریکییەکانیش لەگەڵیان قەدەغە دەبێت، مەگەر رێگەپێدراو بێت.