
بەپێی نووسراوێکی سەرۆکایەتیی دیوانی ئەنجوومەنی وەزیرانی هەرێمی کوردستان، کرێی مانگانەی خزمەتگوزاریی مۆلیدەی تایبەت لە کۆمەڵگە نیشتەجێبووەکانی ناو پڕۆژەی ڕووناکی، بە پێی جۆری یەکە، ڕووبەر و پارێزگاکە دیاری دەکرێت.
نووسراوەکە، کە ئاراستەی وەزارەتی کارەبا کراوە، دیاری دەکات ئەم کرێیە لە یەکی تشرینی دووەمی 2026ەوە هەژمار بکرێت و تا کاتی کۆتاییهاتنی پچڕان و جێگیربوونی کارەبا بەردەوام بێت.
لە دەقەکەدا هاتووە، هەندێک کۆمەڵگەی نیشتەجێبوون بۆ پڕکردنەوەی کاتەکانی پچڕانی کارەبای نیشتمانی مۆلیدەی تایبەت بەکاردەهێنن و لە بەرامبەردا پارە لە دانیشتووان وەردەگرن. بۆ ڕێکخستنی ئەم بابەتە، خشتەیەکی کرێی مانگانە ئامادە کراوە کە تێچووی سووتەمەنی، ڕۆن، کارپێکەر و خەرجییە پەیوەندیدارەکانی مۆلیدە لەبەرچاو دەگرێت.
بەپێی خشتەی هاوپێچ، شووقەیەکی تا 100 مەتر دووجا لە هەولێر و دهۆک مانگانە 20 هەزار دینار دەدات، لە بەرامبەردا هەمان ڕووبەر لە سلێمانی و هەڵەبجە حەوت هەزار دینارە. بۆ شووقەیەکی 101 بۆ 150 مەتر دووجاش، کرێکە لە هەولێر و دهۆک 29 هەزار دینار و لە سلێمانی و هەڵەبجە 10 هەزار دینار دیاری کراوە.
کرێی شوقەیەکی زیاتر لە 200 مەتر دووجا لە هەولێر و دهۆک 48 هەزار دینار و لە سلێمانی و هەڵەبجە 16 هەزار دینارە. خشتەکە نرخە جیاوازەکانی ڤێلا و یەکە بازرگانییەکانیش لەخۆ دەگرێت.